(ನ್ಯೂಸ್ ಕಡಬ) newskadaba.com ಆ. 19: ಕಜಕಿಸ್ತಾನ: ಇಲ್ಲಿ ನಡೆದ ಏಷ್ಯನ್ ಶೂಟಿಂಗ್ ಚಾಂಪಿಯನ್ಶಿಪ್ನ ಮಹಿಳಾ ವಿಭಾಗದ ಸ್ಪರ್ಧೆಯಲ್ಲಿ ಭಾರತದ ರಶ್ಮಿಕಾ ಸಹಗಲ್ ಚಿನ್ನ ಗೆದ್ದರೆ, ಡಬಲ್ ಒಲಿಂಪಿಕ್ ಪದಕ ವಿಜೇತೆ ಮನು ಭಾಕರ್ 10 ಮೀಟರ್ ಏರ್ ಪಿಸ್ತೂಲ್ ಸ್ಪರ್ಧೆಯಲ್ಲಿ ಕಂಚಿನ ಪದಕ ಗೆದ್ದರು. ಇದು ಏಷ್ಯನ್ ಚಾಂಪಿಯನ್ಶಿಪ್ನಲ್ಲಿ ಮನು ಭಾಕರ್ ಗೆದ್ದ 9 ನೇ ಪದಕ.
ಮಂಗಳವಾರ ನಡೆದ 10 ಮೀಟರ್ ಏರ್ ಪಿಸ್ತೂಲ್ ಸ್ಪರ್ಧೆಯಲ್ಲಿ ಎಂಟು ಆಟಗಾರರ ಫೈನಲ್ನಲ್ಲಿ ಮನು 219.7 ಅಂಕಗಳನ್ನು ಗಳಿಸಿ ಮೂರನೇ ಸ್ಥಾನ ಪಡೆದರು. ಸೀನಿಯರ್ ವಿಭಾಗದಲ್ಲಿ ಮನು ಭಾಕರ್, ಸುರುಚಿ ಸಿಂಗ್ ಮತ್ತು ಪಾಲಕ್ ಒಳಗೊಂಡ ತಂಡ ಫೈನಲ್ ತಲುಪಲು ವಿಫಲವಾದರೂ ಒಟ್ಟು 1730 ಅಂಕಗಳೊಂದಿಗೆ ಮೂರನೇ ಸ್ಥಾನ ಗಳಿಸಿತು.
ಚೀನಾದ ಕ್ವಿಯಾಂಕೆ ಮಾ 243.2 ಅಂಕಗಳೊಂದಿಗೆ ಚಿನ್ನದ ಪದಕ ಗೆದ್ದರು, ಕೊರಿಯಾದ ಜಿಯಿನ್ ಯಾಂಗ್ 241.6 ಅಂಕಗಳೊಂದಿಗೆ ಬೆಳ್ಳಿ ಪದಕ ಗೆದ್ದರು. ಅರ್ಹತಾ ಸುತ್ತಿನಲ್ಲಿ 584 ಅಂಕಗಳೊಂದಿಗೆ ಮೂರನೇ ಸ್ಥಾನ ಪಡೆದ ನಂತರ ಭಾಕರ್ ಫೈನಲ್ ಪ್ರವೇಶಿಸಿದರು. ಈ ವರ್ಷ ಮೂರು ವಿಶ್ವಕಪ್ ಚಿನ್ನದ ಪದಕಗಳನ್ನು ಗೆದ್ದು ಏಷ್ಯನ್ ಚಾಂಪಿಯನ್ಶಿಪ್ಗೆ ಪ್ರವೇಶಿಸಿದ್ದ ಸುರುಚಿ, 574 ಅಂಕಗಳೊಂದಿಗೆ 12 ನೇ ಸ್ಥಾನ ಪಡೆದ ನಂತರ ಸ್ವಲ್ಪದರಲ್ಲೇ ಅವಕಾಶ ವಂಚಿತರಾದರ., ಆದರೆ ಪಾಲಕ್ 573 ಅಂಕಗಳೊಂದಿಗೆ 17 ನೇ ಸ್ಥಾನ ಪಡೆದರು.
ಈ ಪ್ರಶಸ್ತಿ ಗೆಲ್ಲುವ ಮೂಲಕ, ಒಲಿಂಪಿಕ್ ಯಶಸ್ಸಿನ ಒಂದು ವರ್ಷದ ನಂತರವೂ ಭಾಕರ್ ಉತ್ತಮ ಲಯದಲ್ಲಿದ್ದಾರೆಂದು ತೋರಿಸಿದ್ದಾರೆ. ಈ ಋತುವಿನ ಆರಂಭದಲ್ಲಿ, ಏಪ್ರಿಲ್ನಲ್ಲಿ ನಡೆದ ಲಿಮಾ ಲೆಗ್ ವಿಶ್ವಕಪ್ನಲ್ಲಿ 10 ಮೀಟರ್ ಏರ್ ಪಿಸ್ತೂಲ್ ಸ್ಪರ್ಧೆಯಲ್ಲಿ ಬೆಳ್ಳಿ ಪದಕ ಗೆದ್ದಿದ್ದರು. ಆದಾಗ್ಯೂ, ಜೂನ್ನಲ್ಲಿ ನಡೆದ ಮ್ಯೂನಿಚ್ ವಿಶ್ವಕಪ್ನಲ್ಲಿ 25 ಮೀಟರ್ ಪಿಸ್ತೂಲ್ ಸ್ಪರ್ಧೆಯಲ್ಲಿ ಆರನೇ ಸ್ಥಾನ ಪಡೆದಿದ್ದರು.
