(ನ್ಯೂಸ್‌ ಕಡಬ) newskadaba.com, ಅ. 03. 182 ಜನರನ್ನು ಹೊತ್ತೊಯ್ಯುತ್ತಿದ್ದ ಫ್ಲೈದುಬೈ ವಿಮಾನದಲ್ಲಿ ನಡೆದ ಆತಂಕಕಾರಿ ಘಟನೆ ಇದೀಗ ಮತ್ತಷ್ಟು ಗಂಭೀರ ತಿರುವು ಪಡೆದಿದೆ.ವಿಮಾನವನ್ನು ಅಪಾಯಕ್ಕೆ ತಳ್ಳಿದ ಆರೋಪ ಎದುರಿಸುತ್ತಿರುವ ಸಹ ಪೈಲಟ್‌ಗೆ ಈ ಹಿಂದೆ ಒಮಾನ್‌ನಲ್ಲಿ ವಿಮಾನ ಹಾರಾಟ ನಡೆಸದಂತೆ ನಿಷೇಧಿಸಲಾಗಿತ್ತು ಎಂಬ ಮಾಹಿತಿ ಬಹಿರಂಗವಾಗಿದೆ.
ಉಗ್ರವಾದಿ ವಿಚಾರಧಾರೆಗಳೊಂದಿಗೆ ಆತನಿಗೆ ಸಂಪರ್ಕವಿರಬಹುದು ಎಂಬ ಶಂಕೆಯ ಹಿನ್ನೆಲೆಯಲ್ಲಿ ಒಮಾನ್‌ನಲ್ಲಿ ಹಾರಾಟ ನಿರ್ಬಂಧ ವಿಧಿಸಲಾಗಿತ್ತು ಎನ್ನಲಾಗಿದೆ. ಬಳಿಕ ಯುಎಇ ಮೂಲದ ವಿಮಾನಯಾನ ಸಂಸ್ಥೆಯೊಂದು ಆತನನ್ನು ನೇಮಕ ಮಾಡಿಕೊಂಡಿತ್ತು.ಇನ್ನು, ನೇಮಕದ ವೇಳೆ ಆತನ ಹಿಂದಿನ ದಾಖಲೆಗಳು ಮತ್ತು ಭದ್ರತಾ ಹಿನ್ನೆಲೆಯನ್ನು ಎಷ್ಟು ಮಟ್ಟಿಗೆ ಪರಿಶೀಲಿಸಲಾಗಿತ್ತು ಎಂಬುದು ತನಿಖೆಯ ಪ್ರಮುಖ ಅಂಶವಾಗಿದೆ.
ಇದೇ ವೇಳೆ, ವಿಮಾನದ ಕಾಕ್‌ಪಿಟ್‌ನಲ್ಲಿ ಪೈಲಟ್‌ಗಳ ನಡುವೆ ಘರ್ಷಣೆ ನಡೆದಿದ್ದು, ವಿಮಾನ ಸುಮಾರು 16,600 ಅಡಿ ಎತ್ತರ ಕಳೆದುಕೊಂಡಿತ್ತು. ಬಳಿಕ ಪ್ರಯಾಣಿಕರ ನೆರವಿನಿಂದ ಸಹ ಪೈಲಟ್‌ನನ್ನು ನಿಯಂತ್ರಿಸಿ, ವಿಮಾನವನ್ನು ಸೌದಿ ಅರೇಬಿಯಾದ ಟಬುಕ್‌ನಲ್ಲಿ ಸುರಕ್ಷಿತವಾಗಿ ಇಳಿಸಲಾಯಿತು.
ಸದ್ಯ ಘಟನೆಯ ಹಿಂದಿನ ನಿಜವಾದ ಕಾರಣ, ಸಹ ಪೈಲಟ್‌ನ ಉದ್ದೇಶ ಹಾಗೂ ಆತನ ಭದ್ರತಾ ಹಿನ್ನೆಲೆ ಕುರಿತು ತನಿಖೆ ಮುಂದುವರಿದಿದೆ.
