(ನ್ಯೂಸ್ ಕಡಬ) newskadaba.com ಕಡಬ, ಫೆ. 13. ತಾಲೂಕಿನ ರಾಮಕುಂಜ ಹಾಗೂ ಕೊಯಿಲ ಗ್ರಾಮದಲ್ಲಿ ರಾತ್ರಿ ವೇಳೆ ನಿರಂತರ ಜಾನುವಾರು ಕಳ್ಳತನ ಆಗುತ್ತಿರುವ ಕುರಿತು ದೂರುಗಳು ಕೇಳಿ ಬರುತ್ತಿರುವ ಬೆನ್ನಲ್ಲೇ ಫೆ. 09ರಂದು ರಾತ್ರಿ ಬೆಳಗಾಗುವುದರೊಳಗೆ 8 ಜಾನುವಾರು ಕಳವಾಗಿರುವ ಕುರಿತು ವರದಿಯಾಗಿದೆ.
ಕೊಯಿಲ ಗ್ರಾಮದ ದೇವಳ ಬಳಿ ನಿವಾಸಿಗಳಾದ ಇಬ್ಬು ಎಂಬವರಿಗೆ ಸೇರಿದ 2 ಹೋರಿ, ರಜಾಕ್ ಎಂಬವರ 1 ಹೋರಿ, ಅಬೂಬಕ್ಕರ್ ಎಂಬವರ 2 ಹೋರಿ, ಮೋನು ಎಂಬವರಿಗೆ ಸೇರಿದ 1 ಹಸು, ಆತೂರು ಪೇಟೆ ನಿವಾಸಿಯೋರ್ವರ 1 ಹಸು ಸೇರಿದಂತೆ ಕೊಯಿಲ ಮತ್ತು ಆತೂರು ಪರಿಸರದಿಂದ 8ಕ್ಕೂ ಅಧಿಕ ಜಾನುವಾರು ಕಳವಾಗಿರುವುದಾಗಿ ವರದಿಯಾಗಿದೆ. ತಿಂಗಳ ಹಿಂದೆ ಕೊಯಿಲ ಗ್ರಾಮದ ಗಂಡಿಬಾಗಿಲು ಪರಿಸರದಿಂದಲೂ ಜಾನುವಾರು ಕಳ್ಳತನವಾಗಿದ್ದು, ಈ ಪ್ರದೇಶದಲ್ಲಿ ನಿರಂತರವಾಗಿ ಜಾನುವಾರು ಕಳ್ಳತನ ನಡೆಯುತ್ತಿರುವುದಾಗಿ ಗ್ರಾಮಸ್ಥರು ದೂರಿಕೊಂಡಿದ್ದಾರೆ. ಕೆಲ ದಿನಗಳಿಂದ ಆತೂರು ಪರಿಸರದಲ್ಲಿ ರಾತ್ರಿ ಹೊತ್ತಿನಲ್ಲಿ ಪಿಕ್‌ಆಪ್ ವಾಹನವೊಂದು ಓಡಾಟ ನಡೆಸುತ್ತಿದ್ದು, ಯಾರೋ ಕಳ್ಳರು ಜಾನುವಾರುಗಳನ್ನು ಕಳವು ಮಾಡಿ ಕಸಾಯಿಖಾನೆಗಳಿಗೆ ಸಾಗಾಟ ಮಾಡಿರುವ ಸಾಧ್ಯತೆ ಬಗ್ಗೆ ಸಂಶಯ ವ್ಯಕ್ತವಾಗಿದೆ.
