(ನ್ಯೂಸ್ ಕಡಬ) newskadaba.com, ಸೆ .15. ರಾಜ್ಯದ ಸರ್ಕಾರಿ ಪ್ರಥಮ ದರ್ಜೆ ಕಾಲೇಜುಗಳಲ್ಲಿ ನಕಲಿ ಪಿಎಚ್ಡಿ (PhD) ಪ್ರಮಾಣಪತ್ರ ಸಲ್ಲಿಕೆ ತಡೆಯಲು ಕಾಲೇಜು ಶಿಕ್ಷಣ ಇಲಾಖೆ ಕಠಿಣ ಕ್ರಮ ಕೈಗೊಂಡಿದ್ದು, 452 ಅತಿಥಿ ಉಪನ್ಯಾಸಕರಿಗೆ ನೋಟಿಸ್ ಜಾರಿಗೊಳಿಸಿದೆ.
2025-26ನೇ ಸಾಲಿನಲ್ಲಿ ಅರ್ಜಿ ಸಲ್ಲಿಸುವಾಗ ಪಿಎಚ್ಡಿ ಅರ್ಹತೆ ಇದೆ ಎಂದು ನಮೂದಿಸಿದ್ದ ಈ 452 ಉಪನ್ಯಾಸಕರು, 2026-27ನೇ ಸಾಲಿನ ಆನ್ಲೈನ್ ಅರ್ಜಿಯಲ್ಲಿ ಪಿಎಚ್ಡಿ ಅರ್ಹತೆಯನ್ನು ನಮೂದಿಸಿಲ್ಲ. ಈ ವ್ಯತ್ಯಾಸದಿಂದಾಗಿ ಇಲಾಖೆಗೆ ನಕಲಿ ದಾಖಲೆ ಸಲ್ಲಿಕೆಯ ಶಂಕೆ ವ್ಯಕ್ತವಾಗಿದೆ.
ಸಂಬಂಧಪಟ್ಟ ಕಾಲೇಜು ಪ್ರಾಂಶುಪಾಲರು ಈ ಉಪನ್ಯಾಸಕರಿಗೆ ನೋಟಿಸ್ ತಲುಪಿಸಿ, 1 ವಾರದೊಳಗೆ ಅವರಿಂದ ಲಿಖಿತ ಸ್ಪಷ್ಟನೆ ಹಾಗೂ ಅಗತ್ಯ ದಾಖಲೆಗಳನ್ನು ಪಡೆದು ಇಲಾಖೆಯ ಆಯುಕ್ತರಿಗೆ ಸಲ್ಲಿಸಬೇಕು.ನಿಗದಿತ ಅವಧಿಯೊಳಗೆ ಸೂಕ್ತ ವಿವರಣೆ ಅಥವಾ ದಾಖಲೆಗಳನ್ನು ಸಲ್ಲಿಸದಿದ್ದರೆ, ಅಂತಹ ಅತಿಥಿ ಉಪನ್ಯಾಸಕರ ವಿರುದ್ಧ ನಿಯಮಾನುಸಾರ ಶಿಸ್ತಿನ ಹಾಗೂ ಕಾನೂನು ಕ್ರಮ ಕೈಗೊಳ್ಳಲಾಗುವುದು ಎಂದು ಇಲಾಖೆ ಎಚ್ಚರಿಸಿದೆ.
