(ನ್ಯೂಸ್‌ ಕಡಬ) newskadaba.com, ನ.29: ಕಳೆದ ಕೆಲವು ದಿನಗಳಿಂದ ಮಹಾರಾಷ್ಟ್ರದ ರಾಜಧಾನಿ ಮುಂಬೈನಲ್ಲಿ ಮರಾಠಿ ಮತ್ತು ವಲಸಿಗರ ನಡುವೆ ಮರಾಠಿ ಭಾಷೆಯ ಕುರಿತು ದೊಡ್ಡ ಚರ್ಚೆ ನಡೆಯುತ್ತಿದೆ. ಬಾಲಿವುಡ್ ಹಿರಿಯ ನಟ ಸುನಿಲ್ ಶೆಟ್ಟಿ ಈ ಬಗ್ಗೆ ಅಭಿಪ್ರಾಯ ವ್ಯಕ್ತಪಡಿಸಿದ್ದು, ‘ಭಾಷಾ ನಿಯಂತ್ರಣಕ್ಕಾಗಿ ಹಿಂಸೆ ತಪ್ಪು’ ಎಂದು ತಿಳಿಸಿದ್ದಾರೆ.
ಮರಾಠಿ ಭಾಷೆಯ ಮೇಲಿನ ಪ್ರಸ್ತುತ ರಾಜಕೀಯ ಮತ್ತು ಅದರಿಂದಾಗುತ್ತಿರುವ ಹಿಂಸಾಚಾರದ ಬಗ್ಗೆ ಇತ್ತೀಚೆಗೆ ಸಂದರ್ಶನವೊಂದರಲ್ಲಿ ಮಾತನಾಡಿದ ಅವರು, “ಮರಾಠಿ ಭಾಷೆಯ ಮೇಲೆ ರಾಜಕೀಯ ಮಾಡುವುದು ಮತ್ತು ಅದನ್ನು ಮಾತನಾಡುವಂತೆ ಒತ್ತಾಯಿಸಲು ಹಿಂಸಾಚಾರ ಮಾಡೋದು ಸಂಪೂರ್ಣವಾಗಿ ತಪ್ಪು. ಬಡ ವ್ಯಕ್ತಿಯನ್ನು ಹೊಡೆಯುವುದರಿಂದ ಏನನ್ನೂ ಸಾಧಿಸಲಾಗುವುದಿಲ್ಲ” ಎಂದಿದ್ದಾರೆ.
“ನಾನು ಮುಂಬೈನವನು. ಈ ನಗರ ನನಗೆ ಹೆಸರು, ಯಶಸ್ಸು, ಪ್ರತಿಷ್ಠೆ, ಎಲ್ಲವನ್ನೂ ನೀಡಿದೆ. ಅದಕ್ಕಾಗಿಯೇ ನಾನು ನನ್ನ ಹೃದಯದಿಂದ ಹೇಳುತ್ತೇನೆ, ನೀವು ಮುಂಬೈನಲ್ಲಿ ವಾಸಿಸಲು ಬಯಸಿದರೆ, ಮರಾಠಿ ಮಾತನಾಡುವುದು ಮತ್ತು ಕಲಿಯುವುದು ಬಹಳ ಮುಖ್ಯ. ನೀವು ವಾಸಿಸುವ ಸ್ಥಳದ ಭಾಷೆಯನ್ನು ಮಾತನಾಡಿದರೆ, ಆ ಸ್ಥಳದ ಜನರ ಪ್ರೀತಿ ಮತ್ತು ಗೌರವ ಹತ್ತು ಪಟ್ಟು ಹೆಚ್ಚಾಗುತ್ತದೆ. ನಾನು ಯಾವಾಗಲೂ ನನ್ನ ಮನೆಯಲ್ಲಿ ನನ್ನ ಸಿಬ್ಬಂದಿಗೆ ಮರಾಠಿ ಮಾತನಾಡುತ್ತೇನೆ. ಆದರೆ ಯಾರೂ ಭಾಷೆಯನ್ನು ಕಲಿಯಲು ಒತ್ತಾಯಿಸಬಾರದು ಅಥವಾ ಅವರನ್ನು ಮಾತನಾಡುವಂತೆ ಒತ್ತಾಯಿಸಬಾರದು ಎಂಬುದು ನಿಜ. ನಿಮ್ಮ ಸ್ವಂತ ಮಗುವನ್ನು ಸಹ ಏನನ್ನಾದರೂ ಕಲಿಯುವಂತೆ ನೀವು ಒತ್ತಾಯಿಸಲು ಸಾಧ್ಯವಿಲ್ಲ. ಹಾಗಾದರೆ ನೀವು ಬೇರೆಯವರನ್ನು ಅದನ್ನು ಮಾಡಲು ಹೇಗೆ ಒತ್ತಾಯಿಸಬಹುದು?” ಎಂದು ಪ್ರಶ್ನಿಸಿದ್ದಾರೆ.
