(ನ್ಯೂಸ್ ಕಡಬ) newskadaba.com ಕಡಬ, ಮಾ.05. ಕೊನೆಗೂ ಕಡಬ ಜನತೆಯ ಬಹುಕಾಲದ ಕನಸು ನನಸಾಗುವ ಸಂದರ್ಭಕ್ಕೆ ಗಳಿಗೆ ಕೂಡಿಬಂದಿದ್ದು, ನೂತನ ಕಡಬ ತಾಲೂಕಿನ ಅಧಿಕೃತ ಉದ್ಘಾಟನೆಯು ಮಾರ್ಚ್ 07 ಗುರುವಾರದಂದು ಸಂಜೆ 5.30 ಗಂಟೆಗೆ ನಡೆಯಲಿದೆ.
ಈ ಬಗ್ಗೆ ರಾಜ್ಯ ಕಂದಾಯ ಸಚಿವ ಆರ್.ವಿ. ದೇಶಪಾಂಡೆಯವರ ದಕ್ಷಿಣ ಕನ್ನಡ ಪ್ರವಾಸದ ಸಮಯ ನಿಗದಿಯಾಗಿದ್ದು, ಗುರುವಾರ ಮಧ್ಯಾಹ್ನ ಮೂಡುಬಿದಿರೆ ತಾಲೂಕನ್ನು ಉದ್ಘಾಟಿಸಿ ಆ ಬಳಿಕ ಸಾಯಂಕಾಲ ಕಡಬ ತಾಲೂಕು ಉದ್ಘಾಟನೆ ಹಾಗೂ ಮಿನಿ ವಿಧಾನಸೌಧಕ್ಕೆ ಶಂಕುಸ್ಥಾಪನೆ ನಡೆಯಲಿದೆ. ಕಳೆದ ಐದಾರು ಬಾರಿ ದಿನ ನಿಗದಿಯಾಗಿ ಕೊನೆಯ ಹಂತದಲ್ಲಿ ಮುಂದೂಡಲ್ಪಟ್ಟಿದ್ದ ಕಡಬ ತಾಲೂಕು ಉದ್ಘಾಟನೆಗೆ ಗುರುವಾರದಂದು ಅಧಿಕೃತ ಚಾಲನೆ ದೊರೆಯಲಿದೆ.
