(ನ್ಯೂಸ್ ಕಡಬ) newskadaba.com ಮಂಗಳೂರು, ನ.3. ಪಂಚ ದ್ರಾವಿಡ ಭಾಷೆಗಳಲ್ಲಿ ಒಂದಾದ ತುಳು ಭಾಷೆಯನ್ನು ಸಂವಿಧಾನದ 8ನೇ ಪರಿಚ್ಛೇದಕ್ಕೆ ಸೇರಿಸುವಂತೆ ಕೇಂದ್ರ ಹಾಗೂ ರಾಜ್ಯ ಸರ್ಕಾರದ ಮೇಲೆ ಒತ್ತಡ ಹೇರಲು ಮಂಗಳೂರಿನ ಜೈ ತುಳುನಾಡು ಸಂಘಟನೆಯ ವತಿಯಿಂದ 1 ಲಕ್ಷ ಟ್ವೀಟ್ ಅಭಿಯಾನವನ್ನು ನಡೆಸಲಾಯಿತು.
ಕರಾವಳಿ ಜಿಲ್ಲೆಯನ್ನು ಪ್ರತ್ಯೇಕ ತುಳುರಾಜ್ಯವಾಗಿ ಪರಿಗಣಿಸುವಂತೆ ಗಮನ ಸೆಳೆಯಲು ಕಪ್ಪು ದಿನವನ್ನಾಗಿ ಘೋಷಿಸಿ ಇನ್ನೊಂದು 1 ಲಕ್ಷ ಟ್ವೀಟ್ ಗುರಿಯನ್ನು ಅಭಿಯಾನವನ್ನು ಜೋಡಿಸಲಾಯಿತು. ಒಂದೇ ದಿನ 2 ಲಕ್ಷ ಟ್ವೀಟ್’ಗಳು ಟ್ರೆಂಡ್ ಆಯಿತು.
ಕನ್ನಡದಲ್ಲಿ ತುಳು ಭಾಷೆಯನ್ನು ಟೈಪ್ ಮಾಡಿದ ಟ್ವೀಟ್ಟಿಗರು, ತುಳುವಿಗೆ ಅಧಿಕೃತ ಭಾಷಾ ಸ್ಥಾನಮಾನವನ್ನು ನೀಡುವಂತೆ ಆಗ್ರಹಿಸಿ ಕೇಂದ್ರ ಹಾಗೂ ರಾಜ್ಯ ಸರ್ಕಾರಕ್ಕೆ ದಿನವಿಡಿ ಟ್ವೀಟ್ ಮಾಡಿದರು. ಬೆಳಗ್ಗೆ 6 ಗಂಟೆಗೆ ಆರಂಭವಾದ ಟ್ವೀಟ್ ಮಧ್ಯರಾತ್ರಿ 12 ಗಂಟೆವರೆಗೆ ಮುಂದುವರಿದಿದೆ ಎಂದು ಜೈ ತುಳುನಾಡು ಸಂಘಟನೆಯ ಅಧ್ಯಕ್ಷ ಅಶ್ವತ್ಥ್ ತಿಳಿಸಿದ್ದಾರೆ.
ತುಳುವನ್ನು 8ನೇ ಪರಿಚ್ಛೇದಕ್ಕೆ ಸೇರ್ಪಡೆಗೊಳಿಸುವಂತೆ ಹಾಗೂ ಕಪ್ಪು ದಿನವನ್ನಾಗಿ ಕರೆಸಿಕೊಂಡ ಟ್ವೀಟಿಗರು, 1 ಲಕ್ಷ ಟ್ವೀಟ್ ಅಭಿಯಾನ ಇದೇ ಮೊದಲ ಬಾರಿಗೆ ನಡೆಸಲಾಗಿದೆ. ಈ ಹಿಂದೆ ಟ್ವೀಟ್ ಅಭಿಯಾನ ನಡೆಸಿದರೂ ಪರಿಣಾಮಕಾರಿಯಾಗಿರಲಿಲ್ಲ. ಹ್ಯಾಷ್‌’ಟ್ಯಾಗ್ ಸಮರ್ಪಕವಾಗಿ ಇರಲಿಲ್ಲ. ಈ ಬಾರಿ ಹ್ಯಾಷ್‌’ಟ್ಯಾಗ್’ನ್ನು ಒಂದೇ ವಾಕ್ಯದಲ್ಲಿ ನೀಡಲಾಗಿದೆ. ‘ಬ್ಲಾಕ್ ಡೇ ಫಾರ್ ತುಳುನಾಡ್’ ಎಂದು ಹ್ಯಾಷ್‌’ಟ್ಯಾಗ್ ನೀಡಲಾಗಿದ್ದು, ಸಂಜೆ 3 ಗಂಟೆಗೆ 80 ಸಾವಿರ ಟ್ವೀಟ್ ಮಾಡಲಾಗಿದೆ. ಇದರೊಂದಿಗೆ ನಿಗದಿತ 1 ಲಕ್ಷ ಗುರಿಯನ್ನು ಮಧ್ಯರಾತ್ರಿಯೊಳಗೆ ತಲುಪುತ್ತೇವೆ. ಇದೇ ರೀತಿ ತುಳುವನ್ನು 8ನೇ ಪರಿಚ್ಛೇದಕ್ಕೆ ಸೇರ್ಪಡೆಗೊಳಿಸುವ ವಿಚಾರದ ಟ್ವೀಟ್ ಕೂಡ ರಾತ್ರಿ ವೇಳೆಗೆ 1 ಲಕ್ಷ ಗುರಿ ತಲುಪಲಿದೆ ಎನ್ನುತ್ತಾರೆ ಸಂಘಟಕರು. ಈ ಟ್ವೀಟ್’ನ್ನು ಪ್ರಧಾನಿ, ಗೃಹ ಸಚಿವರು ಹಾಗೂ ಸಂಸದರಿಗೆ, ಮುಖ್ಯಮಂತ್ರಿಗೆ ಕಳುಹಿಸಲಾಗಿದೆ.
ಪ್ರಧಾನಿ ನರೇಂದ್ರ ಮೋದಿ ದಕ್ಷಿಣ ಕನ್ನಡ ಜಿಲ್ಲೆಗೆ ಆಗಮಿಸಿದಾಗಲೂ ಸ್ವಯಂ ಆಗಿ ಟ್ವೀಟ್ ಅಭಿಯಾನ ನಡೆಸಲಾಗಿತ್ತು. ತುಳು ಭಾಷೆಯನ್ನು 8ನೇ ಪರಿಚ್ಛೇದಕ್ಕೆ ಸೇರ್ಪಡೆಗೊಳಿಸಬೇಕು ಎಂಬ ಹಕ್ಕೊತ್ತಾಯ ಸಲ್ಲಿಸಲು ಟ್ವೀಟ್ ಮಾಡಲಾಗಿತ್ತು. ಈ ಟ್ವೀಟ್ ಬಗ್ಗೆ ಟ್ವಿಟರ್, ಫೇಸ್‌’ಬುಕ್, ವಾಟ್ಸಪ್ ಸೇರಿದಂತೆ ಸಾಮಾಜಿಕ ಜಾಲತಾಣಗಳಲ್ಲಿ ಪ್ರಚಾರ ನಡೆಸಲಾಗಿತ್ತು.
