ನಮ್ಮ ತುಳುನಾಡ್ ನಮ್ಮ ಹೆಮ್ಮೆ ➤ ಮುಕಾಂಬಿ_ಗುಳಿಗ

(ನ್ಯೂಸ್ ಕಡಬ) newskadaba.com ಮಂಗಳೂರು, ಜು.27:  ತುಳುವ ನಾಡ್’ದ ಪಾಡ್ದನೋಲು ತುಳುನಾಡುದ ಪಿರಾಕ್’ದ ಬದ್ಕ್’ಗ್ ಚರಿತ್ರೆಲೆಗ್ ಪತ್ತಿನ ಕೈಕನ್ನಡಿ ಪಂದ್ ಪನೋಳಿ. ಇಂಚಿತ್ತಿನ ಪಾಡ್ದನ ಪ್ರಪಂಚೋನು ತೂವೋಂದು ಪೋನಗ ನಮಕ್ ತುಳುವೆರೆನ ಬದ್ಕ್, ಬೊಕ್ಕ ಕಟ್ಟ್ ಕಟ್ಟಲೆದ ಪರಾ ಪರಾ ವಿಷಯೋಲೆನ ಪೊಸ ಪೊಸ ಜ್ಞಾನ ತಿಕ್ಕೊಂದು ಪೋಪುಂಡು. ಪಾಡ್ದನೊಲೆನ್ ತೂನಗ, ಅವೆತೋ ಪಾಡ್ದನ ಪ್ರಕಾರೊಲೆಡ್ ಒಂಜಿ ಪ್ರಕಾರ ಪೊಣ್ಣ ಜೀವನದ ಮಿತ್ತ್ ಬೊಲ್ಪು ಬೂರಾವುನ ಅಂಚಿತ್ತಿನ ಪಾಡ್ದನೋಲೆಡ್ ದುಂಬುದ ಸಾಲ್,ಡ್ ಉಂತುದ್ ನೆಗತ್ತ್ ತೋಜುಂಡ್
ಮೂಕಾಂಬಿ ಗುಳಿಗ / ಅಗ್ನಿ ಗುಳಿಗ ಪಾಡ್ದನ

ಸುಮಾರ್ 5-6 ವರ್ಷೋಡು ದುಂಬು ಎಂಕ್ಲೆನ ಬರಿತ ಇಲ್ಲದ ದೊಡ್ಡ( ಅಜ್ಜಿ) ಪಂಡಿನ ಈ ಕಥೆ ಇನಿಕ್ಲಾ ನೆನಪುನಗ ಕಣ್ಣುಡ್ ನೀರ್ ಬರ್ಪುನ ಸುಳ್ಳತ್ತ್. ಒಂಜಿ ಪೊಣ್ಣನ ಬೊಕ್ಕ ಅಲೆನ ಇಲ್ಲದಕ್ಲೆನ ದುರಂತ ಅಂತ್ಯನ್ ನಮ್ಮ ಕಣ್ಣೆದುರುಗ್ ತೋಜುಲೆಕ್ಕ ನಮ್ಮ ಪಿರಾಕ್’ದ ಪಾಡ್ದನಕಾರೆರ್ ಕಟ್ಟುದೆರ್.
ಇಂಚಿನ ಅವೆತ್ತೋ ಆರಾಧನೆದ ಪಿರಾವು ಇಪ್ಪುನ ವಿಷಯೋಲೆನ್ ಅವ್ವೇತೋ ಸಂಶೋದಕೆರ್ ಸಂಶೋದನೆದ ತುಡರ್ ಪತ್ತ್’ದ್ ಅವೆತ್ತ ಮಿತ್ತ್ ಬೊಲ್ಪು ಪಾರಾದೆರ್. ಅಂಚಿನ ಮುಕಾಂಬಿ ಜೇವುನ ಜೀವನದ ಕಥೆ ಆಲ್ ದೈವ ಆದ್ ನೆಲೆ ಉಂತಿನ ಕಥೆ ಇಂಚ ಉಂಡು: ಆವೊಂಜಿ ಕಾಲೋಡು ತುಳುನಾಡ ಮಣ್ಣ್’ಡ್ ಪೊರ್ಲ ಸಿಂಗಾರೋದ ಪೊಣ್ಣು ಮಗಲ್ ಮುಕಾಂಬಿ ಪನ್ಪಿ ಜೇವುನು ವಸಲ್ಲ ಭಟ್ರ್ ಪನ್ಪಿನಂಚಿನ ವೈದಿಕ ಶಾಸ್ತ್ರೊಲೆಡ್ ಪುಗಾರ್ತೆದ ಮಾಣಿಗ್ ಪೆರ್ಯಕ್ಲೆನ ತನ್ಮಧ್ಯೋಡು ಧಾರೆ ಮೈತ್ ಕೊರ್ಪೆರ್.

ಅಂಚಿಪ್ಪುನ ಕಾಲೋಡು ಕಂಡನಿ ಬುಡೆದಿ ಬಾರಿ ಮೋಕೆಡ್ ಪೊರ್ಲುಡೆ ದಿನ ದೆತ್ತೊಂದು ಇಪ್ಪುನ ಪೊರ್ತುಡ್ ಕಾಲ ನಿಯಮ ಬೆರ್ಮೆರೆ ಇಚ್ಚೆ ಪನ್ಪಲೆಕ್ಕೊ ಊರುಗು ಮಾರಿಯಾದ್ ಮಾಮಲ್ಲ ಬರಗಾಲ ಬತ್ತ್ ಬುಡ್ಪುಂಡು . ಬೈಪಾದ್ ತಿನ್ಕ ಪನ್ನಗ ಅರಿ ಬಾರ್’ಗ್ ತತ್ವಾರ ಬತ್ತಿನ ಕಾಲ, ನರಮಾನಿಲೆಗ್ ಮುರ್ಗೋಲೆಗ್ ಬದ್ಕೆರೆ ಬಂಗ ಆಪಿನ ಒಂಜಿ ಕಾಲ ಬತ್ತುಂಡ್, ಬೊಕ್ಕೊರ್ಯನ ಕೈರ್ದ್ ಒಯ್ತ್ ತಿನ್ಪುನಂಚಿನ ಬಡಪತ್ತುದ ಕಾಲೋಡು ನಿರೆಕರೆತ ಇಲ್ಲದಕುಲು ಊರು ಬುಡುದು ದೂರ ದೂರದ ಊರುಲೆಗ್ ಬಂಜಿದ ಪಡಿಕ್ಕ್ ಬೋಡಾದ್ ಬೆನಿಯೆರೆ ಕಜ್ಜೋ ನಾಡೊಂದು ಪೋವೆರೆಗ್ ಸುರು ಮಲ್ತೆರ್.

ಇಂಚ ಇಪ್ಪುನಗ ಇಲ್ಲಡ್ ಬಂಜಿದ ಬಡವುಗು ಆಪೊತ್ತು ಬರ್ಪಿನಂಚಿನ ಬಡಪತ್ತುದ ಕಾಲೋಗು ವಸುಲ್ಲ ಭಟ್ರ್ ತೆನ್ಕಾಯಿ ಕೇರಳ ರಾಜ್ಯೋಗು ಪೂಜೆದ ಬೆನ್ನಿ ಬೆನ್ಯೆರೆ ಪಿದಾಡ್ಯೆರೆ ಅಟ್ಟನೆ ಮಲ್ಪುವೆರ್ ಬೋಡು ಬೋಡಾಪಿನಂಚಿನ ಪೂಜೆ ಸಾಮಾನುಲೆನ್ ಒಟ್ಟು ಮಂತೊಂದು ಕೈಪತ್ತಿ ಮದಿಮಾಲ್ ಮುಕಾಂಬಿ ಜೇವುನು ಕೈತಡೆ ಲೆಪ್ಪುವೆರ್ ಲೆತ್ತುದ್ “ಮುಕಾಂಬಿ ಯಾನ್ ತೆನ್ಕಾಯಿ ರಾಜ್ಯೋಗು ಪೋದು ಬೆಂದುದು ನಮಕ್ ಬೋಡಾಯಿನೆನ್ ಕೊಂದು ಬರ್ಪೆ. ಪೋಯಿ ಕಜ್ಜೋನು ಬೇಗೋಡೆ ಮುಗಿತೊಂದು ಬರ್ಪೆ ಆತನ ಕಾಲ ಮುಟ್ಟ ನಿನ್ನ ಅಪ್ಪೆ ಅಮ್ಮೆರೆ ಇಲ್ಲಡ್ ಕುಲ್ಲುದು ಎನ್ನ ಸಾದಿ ಕಾತೊಂದು ಇಪ್ಪು” ಪನ್ಪೆರ್.
ಈತ್ ಪಾತೆರ ಕೇಂಡಿನ ಜೇವು ಹಠ ಕಟ್ಟುದು ಕುಲ್ಲುವಳ್ “ಕೈ ಪತ್ತಿ ದೋಷಗ್ ಇರೆ ಬೆರಿ ಬುಡಾಯೆ ಇರೆ ಪಿರಾವುಡೆ ಬರ್ಪೆ ಎನನ್ ಬುಡು ಪೋವಡೆ” ಪಂದ್ ಬುಲಿಪುವಳ್ “ಪೊಣ್ಣುಲು ಬರ್ಪಿನ ನಾಡತ್ತ್ ಅವು ಸೇರ್ ಬಾರ್’ಗ್ ತರೆ ಕಡ್ಪಿ ಮಾಣಿಲು ಉಪ್ಷಿನ ನಾಡ್ ಈ ಬರ್ಪಿನ ಸಮ ಅತ್ತ್” ಪಂದ್ ಏತ್ ಬಾಮಿಂಡಲಾ ಕೇನಂದೆ ಪತ್ತಿ ಬಲ್ಲ್ ಬುಡಂದೆ ಚದಿ ಕಟ್ಟುದು ಪಿದಾಡ್ವಳ್ ಮುಕಾಂಬಿ ಆತಾನಗ ಬೊಡೆದಿನ ಹಠೊಕ್ಕು ಸೋತಿನ ಭಟ್ರ್ ಮುಕಾಂಬಿನ್ಲಾ ಒಟ್ಟುಗು ಲೆತ್ತೊಂದು ಪೋವೆರೆ ಪಿದಾಡ್ವೆರ್ ಅಪಗ.

ಮುಕಾಂಬಿ ಬದುಕುಂಡ ಎಂಕುಲ ನಿಕ್ಕುಲ ಒಂಜೆ ಬೂಡು, ಸೈತುಂಡ ಇರ್ವೆರೆಗ್ಲಾ ಒಂಜೆ ಕಾಟ.
ಪಂದ್ ಪನ್ಪಿನ ಪಾತೆರದ ಒಟ್ಟುಗು ಧೈರ್ಯ ಪಂಡುದು ಲೆತ್ತೊಂದು ಪೋಪೆರ್.ಇಂಚ ಇರ್ವೆರ್’ಲಾ ಸಾದಿ ನಡತೊಂದು ಕಡಂಬಾರ ಮಯ್ಯೆರೆ ಬೂಡುದ ಸಾದಿಡೆ ಪೋವೊಂದು ಇಪ್ಪುನ ಪೊರ್ತುಗು ಕಡಂಬಾರ್ದ ಮಯ್ಯೆರ್ ಎದುರಾಪೆರ್ ಮೊಕ್ಲೆನ್ ಇರ್ವೆರೆನ್ ತೂಯಿನ ಆರ್ ಮೊಕ್ಲೆನ ಗುರ್ತರ್ತ ತೆರಿಯೋನ್ವೆರ್ ಕಡೆಕ್ ಎಂಕ್ಲ ಬೂಡುಗು ಬರೋಡು ಬತ್ತುದ್ ಎಂಕ್ಲೆನ ತಮ್ಮನೋ ಗೆತೊಂದು ಬೆಸರ್ ಕಳೆದ್ ದುಂಬು ಪೋವೋಡು ಪಂದ್ ಅರಿಕೆ ಮಲ್ಪುವೆರ್, ಅರೆ ಪಾತೆರೋಗು ಬಿಲೆ ಕೂರಿನ ಇರ್ವೆರ್ ಕಡಂಬಾರ್’ದ ಬೂಡುಗು ಪೋದು ಅಲ್ಪ ಅಸರ್ ಪರ್ದ್ ಬೆಸರ್ ಕಳೆದ್ ನನ ದುಂಬುದ ಸಾದಿ ನಡಪೆರೆ ಅಟ್ಟನೆ ಮಂತೊಂದು ಇಪ್ಪುನ ಪೊರ್ತುಗು, ಮಯ್ಯೆರ್ ಭಟ್ರೆನ ಕೈತಾಲ್ ಬತ್ತುದ್ ಪನ್ಪೆರ್ “ಭಟ್ರೆ ತೆನ್ಕಾಯಿ ರಾಜ್ಯೋ ಪೊಣ್ಣುಲು ಪೋಪಿನಂಚಿನ ನಾಡ್ ಅತ್ತ್ ಸೇರ್ ಬಾರ್’ಗ್ ತರೆ ಕಡ್ಪುನ ಮಾಣಿಲು ಉಪ್ಪುನ ನಾಡ್ ಅಂಚಾದ್ ಇರೆ ಬೊಡೆದಿ ಅವುಲು ಪೋಪುನ ಸಮ ಅತ್ತ್. ಎಂಕ್ ಎಲ್ವೆರ್ ಮರ್ಮಾಲಲ್ಲು ಉಲ್ಲೆರ್. ಅಕುಲು ಮರ್ಮಾಲಲ್ಲು ಪಂದ್ ಆಂಡಲಾ ಎನ್ನನೇ ಜೊಕ್ಲೆಲೆಕ್ಕ ಸಾಂಕೊಂದು ಉಲ್ಲೆ, ಭಟ್ರೆ ಈರ್ ಒತ್ತೋನ್ವರ್ ಪಂದ್ ಆಂಡಾ ಇರೆನ ಕಜ್ಜ ಮುಗಿತ್ ಬನ್ನೇಟ ಇರೆ ಬುಡೆದಿ 8ನೇ ಮಗಲ್ ಪಂದ್ ಅರ್ತಿ ಪಿರ್ತಿಡ್ ಜೋಕೆಡ್ ಕಾತೊಂದು ಉಪ್ಪುವೆ” ಪಂದ್ ಪಾತೆರ ಕೊರ್ಪೆರ್,

ಮಯ್ಯೆರೆನ ಬಣ್ಣೋದ ಪಾತೆರೋಗು ಮರ್ಲಾಯಿನ ಭಟ್ರ್ ಮುಕಾಂಬಿನ್ ಮಯ್ಯೆರೆ ಕೈತಾಲ್ ಬುಡುದು ದುಂಬು ಪೋಪೆರ್ ಮಯ್ಯೆರ್ ತನ್ನ 7 ಮರ್ಮಾಲಲ್ಲೆನ್ ಕುಲ್ಲಾವುನ ಕಲ್ಲ ಗುಂಡೋದಲೆಕ್ಕಂತಿನ 8ನೇ ಗುಂಡೋಡ್ ಮುಕಾಂಬಿನ್ ಕುಲ್ಲಾವೆರ್.
ಇಂಚ ದಿನ ಪೋವೊಂದು ಇಪ್ಪುನಗ ಪೊಣ್ಣನ ಪೊರ್ಲುಗು ಮರ್ಲಾಯಿನ ಮಯ್ಯೆರ್ ಗುಂಡದ ಬಾಕಿಲ್ ಬೊಟ್ಟುದು ಮುಕಾಂಬಿನ್ ಲೆಪ್ಪುವೆರ್ “ಏರುಯಾ ಮುಕಾಂಬಿ ಯಾನ್ ನಿನ್ನ ಕಂಡನಿ ಬಯಿದೆ ಬಾಕಿಲ್ ದೆಪ್ಪುಲ” ಪಂದ್ ಸ್ವರ ಬದಲ್ತುದು ಪನ್ಪೆರ್ಮೋಸ ಕಪಟೋನು ತೆರಿಯೋನ್ನ ಮುಕಾಂಬಿ ಜೇವು “ಈರೆನ್ನ ಕಂಡನಿ ಅತ್ತ್ ಎನ್ನ ಕಂಡನಿ ಬನ್ನಗ, ಬಂಗಾರಿನ್ನ ಉರ್ಯನೆ ಬೊಳ್ಳಿನ್ನ ಬರ್ಪನೆ ಕನಪೆ ಪಂತೆರ್ ಆರ್ ಬತ್ತೆರ್ಡಾ ಕಿದೆಟ್ ಇತ್ತಿ ಪೆತ್ತ ಕೈಕಂಜಿಲು ಅರಬಾಯಿ ದೀವ, ಪಾರದ ಪೆರಡೆ ದಂಕುದು ಬಲಿಪು” ಪಂದ್ ಪನ್ಪಾಲ್.

ಈತ್ ಪಾತೆರ ಕೇಂಡಿನ ಮಯ್ಯೆರ್ ತನ್ನ ಕಾರುಡ್ ಗುಂಡದ ಬಾಕಿಲ್’ಗ್ ಬಲ ಪಾಡುದ್ ದೊಂಕುವೆರ್ ಬಾಕಿಲ್ದ ಚಿಲ್ಕ/ಚೀಂಪು ಜಾರುಂಡು, ಪಕ್ಕಿ ಪಲಾಯಿ ರಟ್ಪುಂಡು ಬಾಕಿಲ್ ಪೊಲಿದ್ ಬೂರುಂಡು. ಆತಾನಗ ಉಲಾಯಿ ಪೊಗ್ಗಿನ ಮಯ್ಯೆರ್ ಜೇವುನ ಸೆರಂಗ್’ಗ್ ಕೈ ಪಾಡ್ರೆ ದುಂಬಾಪೆರ್ ಜೇವು ಕಣ್ಣುಡ್ ಕಣ್ಣನೀರ್ ದಿಂಜಾವೊನ್ವಲ್ ತನ್ನ ಗತಿನ್ ಎನ್ನೋನ್ವಲ್ “ತಮ್ಮಲೆ ಮೋಕೆಡ್ ಎನನ್ ತೂವೊನ್ವೆ ಪಂದ್ ಎನ್ನ ಕೈ ಪತ್ತಿ ಮದಿಮಾಯಗ್ ಬಾಷೆ ಕೊರಿಯರ್ ಈರ್ ಆಣಾಂಜೋವೆ ಇನಿ ಎನ್ನ ಮೈಕ್ ಕೈ ಪಾಡ್ಯರ್ಡ ಇರೆ ಅಪ್ಪೆರೆ ಮೈಕ್ ಕೈ ಪಾಡಿ ದೋಷ ಬರು” ಪನ್ಪಲ್ . ಈತ್ ಕೇಂಡಿನ ಮಯ್ಯೆರ್ “ಎನ್ನ ಅಪ್ಪೆನ ಮೈ ಮುಟ್ಟಿ ದೋಷ ಬತ್ತುಂಡ ಅರೆ ಸಿರಿ ಮಿರೆನ್ ಪರ್ದ್ ದೋಷ ಕಲೆವೋನ್ವೆ” ಪನ್ಪೆರ್.
ಮುಕಾಂಬಿಗ್ ಬಲತ್ಕಾರೋಡೆ ಬಂಜಿ ಮಲ್ಪುವೆರ್ . ಇಂಚ ಒಂಜಿ ದಿನ ಕಟ್ಟೋರ್ದು ನೀರ್ ಕನಯೆರೆ ಪೋಪಿನ ಪೊರ್ತುಗು ಕಂಡೋಡು ಬೆನ್ಪಿನ ಪೊಂಜೋವುಲು ಮುಕಾಂಬಿನ್ ತೂದು ಮಯ್ಯೆರ್’ಡ ಬಂಜಿ ಮಂತೊಂದಿನಾಲ್ ಬತ್ತಲ್ ಪಂದ್ ಮಸ್ಕಿರಿ ಮಲ್ನುವೆರ್.

ಈತ್ ಕೇಂಡಿನ ಮುಕಾಂಬಿ ತನ್ನ ಅವಸ್ಥೆನ್ ಎನ್ನಿದ್ ಕಣ್ಣನೀರ್ ಬುಡ್ಪಾಲ್ ಎನ್ನ ಮಾನಗ್ ಕುಂದು ಆಂಡ್ ನನ ಬದುಕುದ್ ಮರ್ಯಾದಿ ಇಜ್ಜಿ ಪಂದ್ ಎನ್ನೋನ್ವಲ್. ಕಟ್ಟದ ಬರಿಯೆ ಬರ್ಪಾಲ್. ಮಿತ್ತ್ ಸ್ವಾಮಿನ್ ತಿರ್ತ್ ಪುಡೆಮಿ ಅಪ್ಪೆಗ್ ಕು ಮುಗಿವಾಲ್, ತನ್ನ ಕಂಡನಿ ಇಲ್ಲದ ರಾವು ಗುಳಿಗನ್ ಮನಸ್ಸುಡ್ ಎನ್ನುವಲ್ ಕಡೆ ಕಣ್ಣುಡ್ ಕೊಡಿ ದುಃಖ ಬುಡ್ಪಾಲ್ “ಸ್ವಾಮಿ ಸತ್ಯೋದ ದೈವ ರಾವು ಯಾನ್ ಸತ್ಯೋದ ಮಗಲ್ ಅಂದುಂದ್ ಆಂಡ ಎನ್ನ ಜೀವನ್ ಗಿಣಿ ಕೊರಳ್ ಕೊಂದು ಪೋಯಿಲೆಕ್ಕ ಕೊನೋಲ, ಎನ್ನ ಕೈ ಪತ್ತಿ ಕಂಡನಿ ಬರ್ಪುನ ಸಂಧರ್ಬೋಡು ಎನ್ನ ನಡತಿ ಸತ್ಯೋನು ಗಿಣಿ ನುಡಿಲೆಕ್ಕ ನುಡಿಲಾ” ಪಂದ್ ಕಟ್ಟದ ನೀರ್’ಗ್ ಲಾಗಿದ್ ಪಿರಾಣ ಬುಡ್ಪಲ್.

ಈತಾನಗ ಇಂಚಿ ತೆನ್ಕಾಯಿ ರಾಜ್ಯೋಗು ಬೆನ್ಯೆರೆ ಪೋತಿನ ಭಟ್ರೆಗ್ ಒಂಜಿ ಕನ ಬೂರುಂಡು ಕನೋಟು ತೋಜಿನ ರಾವು “ಬಾಲೆ ಮಗಾ ನಮ್ಮ ಮಣ್ಣ್ ದೊಂಕಿನ ಪೊಣ್ಣು ಮಗಲೆಗ್ ಇನಿ ಸಂಚಕಾರ ಬಯಿದುಂಡ್ ಕಡೆಸಾವಂದೆ ಕಡಂಬಾರ್ ಬೂಡುಗು ತುರ್ತಾದ್ ಪಾರೊಂದು ಪೋಲ” ಪನ್ಪಿನ ಸೂಚನೆ ಕೂರ್ಪುಂಡು ಈತ್ ಕೇಂಡಿನ ಭಟ್ರ್ ಮಯ್ಯೆರೆ ಬೂಡುಗು ಪಿದಾಡ್ವೆರ್.
ಇಂಚಿ ದಾಲ ತೆರಿಯಾಂದಿಲೆಕ್ಕ ನಾಟಕ ಮಂತಿನ ಮಯ್ಯರ್ ಮುಕಾಂಬಿನ ಅಪ್ಪೆ ಇಲ್ಲಡೆ “ಇರೆ ಮರ್ಮಾಯೆ ಮಗಲೆನ್ ಎಂಕ್ಲೆ ಬೂಡುಡು ಬುಡುದು ತೆನ್ಕಾಯಿ ರಾಜ್ಯೋಗು ಕಜ್ಜಗ್ ಪೋತೆರ್ ಇರೆ ಮಗಲ್ ಪೂಣ್ಣು ಪೋದು ಪೊಂಜೋವು ಆತಲ್ ನಿಕ್ಲು ತುರ್ತಾದ್ ಬತ್ತುದ್ ಅಲೆನ್ ಲೆತ್ತೊಂದು ಪೋವೋಡು” ಪಂದ್ ಓಲೆ ಮಾಣಿ ಕಡಪುಡುವೆರ್.

ಈ ಸುದ್ದಿ ಕೇಂಡಿನ ಅಪ್ಪೆ ಅಮ್ಮೆ ಖುಷಿಟ್ ಬೋಡು ಬೋಡಾಯಿನ ಸಾಮಾನುಲೆನ್ ಪತ್ತೊಂದು ಊರುರ್ದು ಪಿದಾಡ್ವೆರ್.
ಮೂಲು ಬತ್ತುದ್ ಮಗಲೆನ ಅವಸ್ಥೆ ತೂದು ನಡತಿನ ನಿಜ ವಿಷಯ ತೆರಿದ್ ತರೆ ತರೆ ಹಾಕೊಂದು ಬುಲಿಪುವೆರ್.
ತುರ್ತಾದ್ ಬತ್ತಿನ ವಾಸಲ್ಲ ಭಟ್ರ್ ತರೆ ಹಾಕೊಂದು ಬುಲಿಪುವೆರ್.
ಕಾಟೋಗು ಸೂ ದೀಪೆರ್ , ಕಣ್ಣುಡ್ ಕಣನೀರ್ ಜಪ್ಪಾವೆರ್ “ಮೂಕಾಂಬಿ ಆನಿ ಎನಡಪ್ಪ ಬರ್ಪೆ ಪಂದ್ ಬನ್ನಗ ಮಯ್ಯೆರೆ ಬಣ್ಣೋದ ಪಾತೆರೋಗು ಮರ್ಲಾದ್ ಪೆತ್ತನ್ ಪಿಲಿತ ಬಾಯಿಗ್ ಕೂರ್ಲೆಕ್ಕ ನಿನನ್ ಕೊರ್ದು ಪೋಯೆನೆ. ಆನಿ ನಿಕ್ಕೊಂಜಿ ಪಾತೆರ ಕೊರಿಯೆ ಬದುಕುಂಡ ಎಂಕ್ಲ ನಿಕ್ಕ್’ಲ ಒಂಜೇ ಬೂಡು ಸೈತುಂಡ ಒಂಜೇ ಕಾಟ. ಈ ಇಜ್ಜಂದೆ ಎನ್ನ ಬದ್ಕ್’ಡ್ ಅರ್ಥ ಇಜ್ಜಿ”
ಪಂದ್ ಪನ್ಪೆರ್ ಕಣ್ಣುಡ್ ಕಣನೀರ್ ಬುಡ್ಪೆರ್ ಸತ್ಯದ ರಾವುನು ಎನ್ನುವೆರ್.
“ಇನಿ ಎಂಕ್ಲೆ ಕಣನೀರ್ ತೂಯಿನ ಈ ಮಯ್ಯೆರೆ ಕಡಂಬಾರ್ದ ಬೂಡು ಪಡಿಲ್ ಬೂರ್ದು ಮೂಜಿ ದಿನ ಆವೋಡ್ಡ ಕಾಡ್ ಬಲ್ಲೆ ಪೊದ್ಯೋಡು. ಈ ಕಡಂಬಾರ ಸಂತಾನ ಮುತ್ತುದು ಪೋವೋಡು” ಪಂದ್ ಶಾಪಿದ್ ಕಾಟೋಗು ಲಾಗಿದ್ ಪಿರಾಣ ಬುಡ್ಪೆರ್. ಉಂದೆನ್ ಮಾತ ತೂಯಿನ ಮುಕಾಂಬಿನ ಅಪ್ಪೆ ಅಮ್ಮೆರ್ ಕಾಟೋಗು ಲಾಗಿದ್ ಪಿರಾಣ ಬುಡ್ಪೆರ್. ದಿನ ಮೂಜಿ ಆವೋಡ್ಡ ಪಂಡಿ ಶಾಪ ಪಲಿಪುಂಡು. ಮುಕಾಂಬಿ ಗುಳಿಗನ ಸೇರಿಗೆಡ್ ಆರಾಧನೆ ಗೆತೋನ್ವೆರ್.. ಮೂಕಾಂಬಿನ ಜೀವನಡ್ ನಡತಿನ ದುರಂತ ಕಥೆಕ್ ಸಮ ಆದ್ ಅಗ್ನಿ ಗುಳಿಗ ಪನ್ಪಿನ ಪುರಪ್ಪುಡ್ಲ ಆರಾಧನೆ ಉಂಡು. ಇಂಚಿನ ಅವೆತೋ ಕತೆಕ್ಲು ತುಳುವೆರೆ ಪಾರ್ದನೋಡು ಉಲ್ಲ. ನಮ್ಮ ಜನಕ್ಲೇನ ಅಸಡ್ಡೆರ್ದ್ ಒಲಿ ಮದೆಕ್ ಸೇರ್ದಿನ ಕತೆಕ್ಲು ಏತೋ ಲೆಕ್ಕಗ್ ತಿಕ್ಕಂದ್. ಅವೆತೋ ಕತೆಕ್ಲು ತನ್ನ ನಿಜರೂಪೊನ್ ಕಳೆಯೊಂದು ಪೊಸ ರೂಪಲೆನ್ ಪಡೆತಿನಲ ತೂವೋಲಿ. ಆಂಡ ಇಂಚಿನ ಮೂಲ ಕತೆಕ್ಲೆನ್ ಒರಿಪಾದ್ ದುಂಬು ಕೊನೊಪುನಂಚಿನ ಕಜ್ಜೊಲೆನ್ ಮಲ್ತೊಂದು ಇಪ್ಪುನ ಕೆಲವೇ ಕೆಲವೆರ್ ನಮ್ಮ ನಡುಟ್ ಇತ್ತೆಲಾ ಉಲ್ಲೆರ್ ಪನ್ಪಿನ ಒಂಜಿ ಯೆಲ್ಯ ಸಮಧಾನ.

ಸೊಲ್ಮೆಲು,?
ಬರೆಯಿನ ಕತೆಟ್ ದಾದಂಡಲ ಯೆತ್ಯೋಸೊ ಇತ್ತುಂಡ ಮಾಪು ನಟ್ಟೊನುವೆ.
ಮಾಪು ಇಪ್ಪಡ್.
ಓದಿನ ಪೂರಗ್ಲೆಗ್ಲ ಸೊಲ್ಮೆಲು..

✍️ ವಿವೇಕ್.ಬಿ. ಶೆಟ್ಟಿ.
? Rakesh Konaje Photography